Молитвы об усопших (родителях, супруге, детях), чтение Псалтири и Акафиста до 40 дней

Помяни, Господи Боже наш, в вере и надежди живота вечнаго преставльшагося раба Твоего, брата нашего [Имя], и яко Благ и Человеколюбец, отпущаяй грехи и потребляяй неправды, ослаби, остави и прости вся вольная его согрешения и невольная, избави его вечныя муки и огня геенскаго, и даруй ему причастие и наслаждение вечных Твоих благих, уготованных любящим Тя: аще бо и согреши, но не отступи от Тебе, и несумненно во Отца и Сына и Святаго Духа, Бога Тя в Троице славимаго, верова, и Единицу в Троице и Троицу во Единстве православно даже до последняго своего издыхания исповеда. Темже милостив тому буди, и вера яже в Тя вместо дел да вменится ему, яко несть человек, иже поживет и не согрешит. Но Ты Един еси кроме всякаго греха, и правда Твоя, правда во веки, и Ты еси Един Бог милостей и щедрот, и человеколюбия, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Господи Иисусе Христе, Боже наш, Владыко живота и смерти, Утешителю скорбящих и с сокрушенным сердцем к Тебе притекающих. К Тебе припадаю и молюся: помяни, Господи, во Царствии Твоем усопшаго раба Твоего, родителя моего (или рабу Твою, родительницу мою) [Имя], и сотвори ему (ей) вечную память. Ты, Господи, отъял еси у мене сие дражайшее благо на земли, но да будет благословенно имя Твое святое. Прости, Господи, родителю моему вся согрешения его вольная и невольная, яже словом, яже делом, яже ведением и неведением сотворил есть в житии своем на земли, и по множеству щедрот Твоих всели душу его в селения праведных, идеже несть болезнь, ни печаль, ни воздыхание, но жизнь безконечная. Аминь.

Христе Иисусе, Господи и Вседержителю. Ты благословил еси союз наш супружеский, и ныне по неисповедимому промыслу Твоему разлучил еси мя с другом юности моея. Приими, Владыко, моление мое о упокоении души раба Твоего (рабы Твоея) [Имя]. Ослаби, остави и прости ему (ей) вся согрешения вольная и невольная, соделанная им (ею) на земли, и сподоби его (ю) небеснаго Царствия Твоего со всеми святыми Твоими. Мне же даруй терпение и силу в несении креста вдовства моего, да в мире и покаянии пожив оставшияся дни живота моего, сподоблюся радостныя встречи с ним (нею) в вечных обителех Твоих. Аминь.

Господи Иисусе Христе, Боже наш, Владыко живота и смерти. Утоли скорбь сердца нашего и приими в небесный чертог Твой душу преставльшагося чада нашего [Имя]. Прости ему вся прегрешения вольная и невольная, очисти душу его и даруй ему радость вечную со ангелы и всеми святыми Твоими. Укрепи нас, грешных, в вере и уповании на милосердие Твое, да со смирением глаголем: Господь даде, Господь отъя, буди имя Господне благословенно отныне и до века. Аминь.